Служба Святому блаженному Андрею, симбирскому Христа ради юродивому в Ульяновске


	Служба Святому блаженному Андрею, симбирскому Христа ради юродивому Составлена монахом Савватием (Именавичус) Протодиаконом Алексием Скала А ВЕЛИЦЕЙ ВЕЧЕРНЕ ПО ОБЫЧНОМ СЛАВОСЛОВИИ Стихиры на Господи воззвах, глас 2 От млада, блаженне, суетная и тщетная мира презрел еси, и Христу прилепився, подвигом юродства и совершенным самоотвержением Тому угодил еси, непрестанные молитвы принося Господеви и о всем мире моляся, Андрее преблаженне, и ныне молися Господеви спастися душам нашим. Отряс еси суету и вся тщетные мирския волнения и ко стопам Спасителя мира притекл еси: иго Христово на рамена своя возложив, подвигом юродства тому следовал еси: и ныне молися Господеви спастися душам нашим. Избран Божественным промыслом быв, блаженне, чистотою души своея Христу послужив, предстоя днесь престолу Божия славы, созерцая свет неизреченный и радость несказанную. Темже вопием ти: отче Андрее, молися Господеви спастися душам нашим. Слава: глас 6. Чудное и светоносное днесь торжество, память дивного и блаженнаго Андрея совершающе, к Нему же возопиим: о смиреннейший угодниче Христов, предстателю града и страны нашей, молися Господеви спастися душам нашим.И ныне: глас тойже. Кто тебе не ублажит, Пресвятая Дево... НА ЛИТИИ СТИХИРЫ, глас 5. Умом просветленным Пресвятей Троице предстояще, блаженне Андрее, и Тояже славою осеняемый, вся ны просвети, и за чтущих верных людей множество, к мощам честным твоим приходящим, Христа Жизнодавца умоли: спастися душам нашим. Путем юродства Христа ради шествовал еси, блаженне Андрее, делом твоим явил еси, како в широту райскую добре ходящии во Христе вводими бывают. Темже путем, блаженне, приведи ко Христу и вся верные. СЛАВА: глас тойже. Радуются вси людие вернии, и земля симбирская ликует, празднующе память блаженного Андрея: его бо житием дивным украсися чудно Церковь Симбирская, юже Господь таковым крином украси. Того молитвами подаждь, Господи, милость Твою ко спасению душ наших. И НЫНЕ: глас тойже. Радуйся, благословенная Владычице, Бога плотию неизреченно рождшая, за нас на кресте смерть приявшаго. Того моли, Всеблаженная, да Твоими молитвами спасет души наша. НА СТИХОВНЕ СТИХИРЫ, глас 4. Дал еси дивное утверждение граду Симбирску, Господи, чуднаго смиренника блаженнаго Андрея, неистощимое сокровище преизобильное самоотвержением многим, крепка поборника на гордыню и в бедах заступника: его же молитвами спаси град сей и страну нашу, Иисусе милосерде, и Спас душ наших. Стих: Дивен Бог во святых Своих, Бог Израилев. Дал еси украшение, Господи, граду Симбирску, честныя мощи блаженнаго Андрея, содейственника бывающа чудесем многим, град от запаления огненнаго избавляюща и молящася Тебе, Иисусу милосердному и Спасителю душ наших. Стих: Святым, иже суть на земли Его, удиви Господь вся хотения Своя в них. Дал еси новое знамение верующим в Тя, Господи, истиннаго Твоего угодника: вернии бо приемлют утешение скорбным сердцам, притекающе к нему. Темже убо и мы, днесь сошедшеся, память блаженнаго Андрея празднующе, верно Ти, Господи, вопием: того молитвами спаси нас, Иисусе милосерде, и Спас душ наших. СЛАВА: глас тойже. Что тя наречем, блаженне Андрее: земнаго ангела и небеснаго человека, яко в мире сущая ни во что вменил еси; учителя смирения, яко вся в житии терпел еси радостно; пророка и провидца: будущая бо провидел еси яко настоящая, и в тайне содеянное безтрепетно обличал еси. И ныне молися Христу Богу, умирити мир и утвердити Церковь святую. И НЫНЕ: глас тойже. Храм и Дверь еси, Палато и Престол Царев, Дево всечестная, ею же Избавитель наш, Христос Господь, во тли спящим явися. Солнце сый правды, просветити хотя вся яже созда по образу рукою Своею. Темже, Всепетая, матернее дерзновение к Нему стяжавшая, непрестанно молися спасти души наша. НА УТРЕНИ На Бог Господь тропарь, глас 4 Небесный наш заступниче, За нас пред Богом молитвенниче, Града Симбирска утешение и похвало, В скорбех и бедах скорый помощниче. Ныне, блаженне Андрее, к тебе вопием, На раку честных мощей твоих взирающе И совершенное принося восхваление: Простирая нам руку помощи твоея Настави нас на путь покаяния. ПО ПЕРВОМ СТИХОСЛОВИИ СЕДАЛЕН. Новаго угодника и дивнаго блаженнаго Андрея вернии почтим, светло празднующе всечестную память его : той бо молитвами своими к Богу предстательствует за ны, научая нас пети Христу: прославляяй святых Твоих, Господи, слава Тебе. СЛАВА и НЫНЕ: Богородичен. Множицею избавися род человеческий от зол и бед, молящийся пред Твоими, о Богомати, святыми иконами. Приими, Владычице, вся моления верных о избавлении града сего и страны нашей от лютых бед несогласия предстательством Твоим. ПО ВТОРОМ СТИХОСЛОВИИ СЕДАЛЕН. Суетную прелесть мира отверг еси, истинному Свету и заповедем евангельским последовал еси, блаженне Андрее, и юродством Христа ради Ему искренне послужил еси. Сего ради зовем ти: радуйся, блаженне отче Андрее. СЛАВА И НЫНЕ: Богородичен. Мати Божия, Ты еси свет омраченных, просвети нас потеменных грехами, и простри нам немощным руку помощи Твоея, всем призывающим Тя. окимен, глас 7: Честна пред Господем смерть преподобных Его. тих: Что воздам Господеви о всех, яже воздаде ми? Евангелие: Матфея, зач. 43 или Луки, зач. 24 ПО ПОЛИЕЛЕЕ СЕДАЛЕН: Юродством Христа ради тело свое духу поработил еси, душу болезньми и страданьми освятил еси, блаженне Андрее. Житие свое, яко жертву совершенну, духом совершаемую, представил еси Господеви. Имже возлюблен быв, яко Того единого возлюбил еси: божественныя благодати был еси воистину жилище. ПО 50 ПСАЛМЕ стихира, глас 6. Крест Христов на рамена своя приял еси, сораспялся любовию мирови, и, последовавши заповедем Спаса Христа, суемудрие житейское и всякое пристрастие отвергши, дивным житием просиял еси, и восприял еси вечное блаженство. И днесь Господеви предстоя, помяни всех присно чтущих тя, блаженне Андрее. К А Н О Н СВЯТОМУ БЛАЖЕННОМУ АНДРЕЮ ГЛАС 8. ПЕСНЬ 1. Ирмос: Воду прошед, яко сушу... ев: Святый блаженный отче Андрее, моли Бога о нас. Очистимся духом и смирим умы и сердца наши, омраченные страстьми, яко да светло и радостно восхвалим дивного подвигом блаженного Андрея, Симбирскую славу и заступление. ев: Святый блаженный отче Андрее, молим Бога о нас. Луч божественнаго просвещения ныне нам возсия: приидите вернии, да озаримся светом высоты подвига его, да возгоримся духом, песньми блаженнаго Андрея величающе. Слава Отцу, и Сыну, и Святому Духу. Подвигом юродства во Христе украшен еси, видимо высший смысл показуя, блаженне Андрее: несмысленная обличая, приводя верных к покаянию. И ныне, и присно, и во веки веков. Аминь. Во успении мира не оставила еси, Дево чистая, и ныне нас не оставляй молитвами Твоими, и умири мир Твой, Богородице. ПЕСНЬ 3. Ирмос: Небеснаго круга... В житии своем душевную чистоту стяжав, без неяже никто не узрит Господа, Андрее блаженне отче наш. Ныне же страсти омраченных душ наших утоли молитвами твоими. О всех благах на земли не радев, любовию ко Христу уязвляем, себе отвергшеся и во плоти, яко ангел, явися, страсти умертвил еси, Андрее преблаженне. Слава: Земная вся отринув, небесная наследовал еси, блаженне Андрее. В житии град твой от запалений огненных соблюдал еси, угаси и пламень страстей наших. И ныне: Милости и любве источниче, Дево чистая, молим тя: молитвами Твоими мир сохрани и спаси люди отчаянныя. ПЕСНЬ 4. Ирмос: Ты моя крепость, Господи... Гордым умом людие тщашася уразумети высшая, но токмо смиренным Господь дает благодать узрети небесная. Темже молим тя, блаженне, молитвами твоими спаси души наша. Безстрастием украшен еси и смирением Христа ради блаженства высоты достиг еси, предивне. Души наша твоим смирением сохрани. Слава: Земная отринув и суетная яко тщетная вменив, страсти умертвил еси, блаженне Андрее. Темже в вечное Царство вселился еси, терпения ради своего. И ныне: Цвет чистоты и спасения Двери, молитвами Твоими спаси град сей и страну нашу, Богородице, чистая и благословенная. ПЕСНЬ 5. Ирмос: Вскую мя отринул еси... Простое и беспорочное житие от юности твоея потщался еси, блаженне, сохранити: высоту смирения твоего видев, Пресвятый Дух вселися в тя. Погребл еси страстей возстание умерщвлением гордыни и всецелым самого себе отвержением, жизнь бесконечную приял еси от Господа. Днесь церковь Симбирская светло празднует память твою, блаженне Андрее. Слава: Настави нас на путь покаяния, блаженне Андрее, всегда уклоняющихся от пути праваго, злу ума и гордыне сердца служаще и присно милосердие Божие прогневляющих. И ныне: Источаеши реку исцелений, Дево, недугующим: ты бо влага врачующая души гордыней болящия, и милости пучино всем Тя, Богородице, призывающим. ПЕСНЬ 6. Ирмос: Очисти мя, Спасе... Зря чистым сердцем сокровенная и нераскаянных во зле строго обличавый, непорочным житием блаженство улучив, не престай, блаженне, молитися о чтущих святую память твою. Чист быв сердцем, к чистому источнику благодати притекл еси и душу твою освятил еси светлейших струй причащением, темже и Господь тя прослави. Слава: Святому лику истинных ученик Христовых причислен еси, блаженне Андрее, с ними же Владыце предстоя, непрестанно поминай нас молитвами твоими. И ныне: О, Дево Пречистая, наше упование и прибежище во грехах погибающих: простри нам руку помощи Твоея и спаси нас. КОНДАК СВЯТОМУ, глас 4. Юродства одеждею украшен еси, Попечение презрев о плоти тленней, Венец нетления стяжал еси небесный. Духовною нищетою облеклся еси И по слову Спасову В Царствие вечное вселился еси И престолу Божию предстоя, Немолчно о нас ко Христу взывающий, Блаженне Андрее, предивный чудотворче. ИКОС Душу свою, яко дар смиренный Христу принес еси, преукрашенну бисером подвига твоего. Сего ради и Господь тя прослави и многими дарами почти: на земли быв осиян высотою уничижения и юродства лишеньми, темже на небеси венцем славы украсился еси, блаженне Андрее. Ныне же молися ко Господу даровати душам нашим велию милость. ПЕСНЯ 7. Ирмос: Божия снисхождения... Очистив ум благодатию и сохранив его цел от суемудрия, чувства души добре управив и к высоким устремился еси, нас молитвами твоими не оставляя. Житейское мудрование умертвил еси воздержанием и смирением на небеса восход сотворил еси, блаженне Андрее, души верных благодатию дарований твоих ныне просвещаеши. Слава: Все житие заповедем Христовым поработив, блаженства вечнаго достиг еси, силою Божиею укрепляем. Укрепи и нас немощных молитвами твоими. И ныне: Заступнице мира, Мати Всепетая, помощь всем погибающим в пучине греховней, простри над нами покров милости Твоея, Богородительнице. ПЕСНЬ 8. Ирмос: Седмерицею пещь... овинулся еси во всем Господеви, блаженне, в хранении жития непорочного силою Его укрепляем, ум, сердце и волю в дар принося величию Божию Ныне с лики святых и праведных предстоиши престолу Царя царствующих, небесною благодатию осиянный, блаженне Андрее, молитвами твоими страстей и прилогов вражиих избавляй нас. Слава: Труды в подвиге юродства Христа ради подъяв в жизни своей, блаженно по трудех почил и упокоился еси в Господе, сошел еси во гроб, яко пшеница для житницы Божией созревшая. И ныне: Ведает весь мир Тя роду христианскому Заступницу и Молитвенницу, окропи нас иссопом милости Твоея, Владычице, и очисти нас, да Твоим матерним заступлением паче снега убелимся. ПЕСНЬ 9. Ирмос: Ужасеся о сем небо... Зряще божественную светлость и всех святых, радующихся о Господе, блаженне Андрее, с ними моли Человеколюбца Христа, жития исправление и грехов оставление подати хвалящим верно память твою. От Бога дивным разумом небесным просвещен, просвети умы сердец наших, омраченных гордынею и прегрешений мглою, просвети молитвами твоими. Слава: Храм Святому Духу себе сотворив, блаженне Андрее, темже и нас, молитвами твоими, селения Ему соделай и от всяких напастей и озлоблений избави. И ныне: Чистая и славная голубице, Мати и Дево, щедроты Твоя ниспошли нам от неизреченных милостей Твоих и избави нас от всякия нужды и печали. СВЕТИЛЕН. Велиим подвигом жития твоего, блаженне Андрее, смирением и самоотвержением, яко крилома, высоты блаженства достиг еси и непорочного жития ради почесть от Бога приял еси: и ныне Господь явил нам цельбоносныя мощи твоя. Темже молим тя, блаженне, поминай нас, верою чтущих святую память твою. СЛАВА и НЫНЕ: Богородичен. Пречистая Владычице, милосердаго Спасителя миру рождшая, помилуй нас, озлобленных смутою дний сих и в суемудрии отступивших от спасительных заповедей Христовых и греху поработивших себе гордым своим хотением. Обрати нас, Мати Божия, к свету Сына Твоего молитвами Твоими. НА ХВАЛИТЕХ СТИХИРЫ, глас 8. Неуклонно, преблаженне, прямо путь жизненный шествовал еси, юродствуя Христа ради, вся плотская мудрования умертвил еси и суетная мира, яко паучину, отряс еси, небесную высоту возлюбил еси, идеже со всеми святыми срадуешися, блаженне Андрее, моли спастися душам нашим. От юности до старости разум чист и незлобив младенчески сохранил еси, душу пресветлу тем сотворил еси, блаженством в горних от Господа почтен еси, град свой житием своим украсил еси: сего ради тя почитаем, Андрее блаженне, Ты же не престай молитися о земном отечестве твоем и о творящих память твою. Соберитеся вернии, днесь в память блаженнаго Андрея, и сию вси радостно торжествуйте: се бо благочестия крин и о согражданах теплый молитвенник, волжских пределов удобрение, града Симбирска чудная похвало и заступление, к нему же возопиим: блаженне Андрее, моли Христа Бога о чтущих святую память твою. СЛАВА, глас 6. Новое и дивное Церкви украшение, преизрядный и дивный угодниче Христов, блаженне отче Андрее, моли милостиваго Бога, да прегрешений оставление подаст душам нашим. И НЫНЕ, Богородичен, глас тойже. Богородице, ты еси лоза истинная, возрастившая нам плод живота: молимся Ти, Владычице, со блаженным Андреем, помиловати души наша. АКАФИСТ ВЯТОМУ БЛАЖЕННОМУ АНДРЕЮ СИМБИРСКОМУ, РИСТА РАДИ ЮРОДИВОМУ КОНДАК 1. Избранный угодниче и Христа ради юродивый святый блаженный отче Андрее, с юных лет подвиг отречения от благ житейских избравший, хвалебное ныне приносим тебе пение, чтуще святую память твою. Ты же яко имеяй велие дерзновение к милосердному Господу, от всяких нас бед и напастей свободи, да зовем ти: РАДУЙСЯ, БЛАЖЕННЕ ОТЧЕ АНДРЕЕ, ГРАДА СИМБИРСКА ЧУДНАЯ ПОХВАЛО И ЗАСТУПЛЕНИЕ. ИКОС 1. Равноангельского жития сподобился еси, блаженне Андрее, ибо по ранней смерти благочестивых родителей твоих отверг еси мира суетное служение и вся его ложные красоты. Того ради услыши от нас похвалы, тебе приносимыя: Радуйся, доброго корени отрасль благочестная; Радуйся, чадо молитвы родителей боголюбивых; Радуйся, от рождения твоего Богом избранный; Радуйся, подвиг юродства на себя от отрочества принявший; Радуйся, семя Христова учения в сердце своем возрастивший; Радуйся, вся красная мира ни во что же вменивший; Радуйся, в немощном телеси силу велию явивый; РАДУЙСЯ, БЛАЖЕННЕ ОТЧЕ АНДРЕЕ, ГРАДА СИМБИРСКА ЧУДНАЯ ПОХВАЛО И ЗАСТУПЛЕНИЕ. КОНДАК 2. Видя престранное твое житие, ибо презрев всякое о плоти смертней попечение, в зной и стужу в рубище был облачен, верою теплою и пламенной ко Христу любовию согреваемый, вернии града Симбирска, видя доброту и смирение твое и Духа Святаго стяжание, воспели Богу: АЛЛИЛУИА. ИКОС 2. Разум, от Бога тебе данный, во мнимом безумии сокрыл еси, блаженне; в видимом тела покое дух свой возбуждая, в безгласии своем положил еси хранение устам, но непрестанно в сердце своем молитвы о людях грешных Господу приносил еси. Мы же, дивясь таковому житию твоему, взываем хвалебно: Радуйся, тяжкий крест юродства Христа ради приемший; Радуйся, мнимым безумием сияние благодати сокрывший; Радуйся, яко дитя неразумное пред людьми явился; Радуйся, гордыни пламень с малых лет в себе угасивший; Радуйся, дар прозорливости подвигом молитвы стяжавший; Радуйся, даром сим страждущим послуживший; Радуйся, всем просящим помощи скорое вспоможение; РАДУЙСЯ, БЛАЖЕННЕ ОТЧЕ АНДРЕЕ, ГРАДА СИМБИРСКА ЧУДНАЯ ПОХВАЛО И ЗАСТУПЛЕНИЕ. КОНДАК 3. Невозможная от человек Господом силою Духа Святаго соделается, и сила Божия в немощех совершается; немощный человек самоотвержением себе Христа ради вечнаго врага попирает. Укрепи, блаженне отче Андрее, молитвами твоими и нас, в мятеже суетнаго жития сего изнемогающих, да сподобимся с тобою в небесных чертозех воспевати песнь: АЛЛИЛУИА. ИКОС 3. Ведая, блаженне, яко в земном житии ты провидцем судеб человеческих явлен был, целителем недуг тяжких многих, скорбных утешителем, немощных укреплявшим, заблудшим на путь правды наставником, и ныне вернии к помощи твоей прибегают, воспевающе тебе сице: Радуйся, грядущая яко настоящая провидевый; Радуйся, креста своего усердный носителю; Радуйся, иго Христово и бремя Его благодушно подъемый; Радуйся, дар исцелений от Бога приемый; Радуйся, рубищем паче одежды златотканныя украсивыйся; Радуйся, возлюбивший паче одра мягкаго на земли повержение; Радуйся, поношения яко хвальбу приемлющий; РАДУЙСЯ, БЛАЖЕННЕ ОТЧЕ АНДРЕЕ, ГРАДА СИМБИРСКА ЧУДНАЯ ПОХВАЛО И ЗАСТУПЛЕНИЕ. КОНДАК 4. Видим тя, блаженне Андрее, новую светозарную звезду, чудно возсиявшую на тверди Церкви Российстей, явльшуюся нам в последние времена и сущим в гордыне и прелести ума своего показующую высоту смирения и любве, научая верных пети Богу: АЛЛИЛУИА. ИКОС 4. Духом провидя преподобный Серафим Саровский равное ангельскому дивное житие твое, блаженне отче Андрее, назва тя крепким предстателем и молитвенником граду Симбирску. Мы же, дивящеся таковому о нас недостойных и жестокосердых смотрению Божию, во умилении зовем таковая: Радуйся, волжских пределов светлое украшение; Радуйся, граду Симбирску неложное похваление; Радуйся, Духа Святаго чистое селение; Радуйся, смирением и терпением бесплотным уподобление; Радуйся, всем помощи просящим скорое вспоможение; Радуйся, светильниче Божественнаго света; Радуйся, в смирении своем чудно возвышенный; РАДУЙСЯ, БЛАЖЕННЕ ОТЧЕ АНДРЕЕ, ГРАДА СИМБИРСКА ЧУДНАЯ ПОХВАЛО И ЗСТУПЛЕНИЕ. КОНДАК 5. Боготечней звезде уподобился еси, блаженне отче Андрее, житием твоим освятил еси пределы симбирския, блистающе велиим подвигом себя отвержением. Нас же, погибающих в бурях страстей моря житейского, наставляеши к тихой пристани спасения пособием молитв твоих. Мы же, прославляя Господа, прославльшаго тя, вопием Ему: АЛЛИЛУИА. ИКОС 5. Сподобил тя, блаженне отче, Господь человекам служити и послал ти дар целения недугов плоти немощной; подавал еси страждущим хлеб и чрез него сии от Милосердного Бога исцеление прияли. Ныне же в чертогах небесных хлеб жизни вечныя вкушаеши и молиши за нас, телом и душею немощствующих, и к тебе в умилении взывающих: Радуйся, недугов тяжких целителю; Радуйся, от погибели нечаянной избавителю; Радуйся, в родах тяжких вспомощниче; Радуйся, лукавых бесов посрамителю; Радуйся, отчаявшихся надеждо; Радуйся, чад наших хранителю; Радуйся, гнев Божий от нас отвращающий; РАДУЙСЯ, БЛАЖЕННЕ ОТЧЕ АНДРЕЕ, ГРАДА СИМБИРСКА ЧУДНАЯ ПОХВАЛО И ЗАСТУПЛЕНИЕ. КОНДАК 6. Проповедник и образ евангельского жития был еси в терпении и кротости: Господь, видя высоту смирения твоего, блаженне Андрее, дарова тебе дар зрения тайных и сокровенных. Даром сим многих от погибельного пути греха на стези покаяния наставил еси. Мы же видевши о тебе таковая, Богу поем: АЛЛИЛУИА. ИКОС 6. Предвидел еси, блаженне, кончину суетнаго человеческаго жития, и сохранить душу бессмертную у таковых человек желая, подавал им о сем видимый знак, персть земную или щепу недоуменным в десницу влагая. О сем ведуще, и мы со смирением к тебе припадаем, да умолиши Спаса душ наших христианскую кончину даровати всем ныне вопиющим ти таковая: Радуйся, житием твоим суетность мира сего обличивый; Радуйся, плоть свою со страстьми и похотьми поправый; Радуйся, всякое пристрастие земное от себе отгнавый; Радуйся, мир Христов в душе своей стяжавый; Радуйся, источниче благодати обильный; Радуйся, защитниче наш пред Господом сильный; Радуйся, себе Богу всецело предавый; РАДУЙСЯ, БЛАЖЕННЕ ОТЧЕ АНДРЕЕ, ГРАДА СИМБИРСКА ЧУДНАЯ ПОХВАЛО И ЗАСТУПЛЕНИЕ. КОНДАК 7. Хотяще тебе, блаженнее Андрее, от земнаго жития разрешитися, приобщился еси Честнаго Тела и Крови Христа Бога нашего, просветился еси лицем радостию небесною. Чтущия тя, стекшеся ко смертному одру твоему, видяще радость твою о Господе, токи умиленных слез проливаху, поюще к Богу: АЛЛИЛУИА. ИКОС 7. Новое знамение благоволения своего яви Господь к нам, жестоковыйным, тонущим в гордыне и самообольщения ума своего: указа место погребения и честныя мощи твоя, блаженне, до селе сокрытыя. Новаго тя молитвенника и предстателя пред милосердием Божиим, тя стяжахом, благодарно сердцем и усты вопием ти: Радуйся, смирением высокая стяжавый; Радуйся, очеса своя всегда с упованием на Господа возводивый; Радуйся, скорый и безмездный врачу; Радуйся, воине Христов непобедимый; Радуйся, человече Божий, смирением и терпением, яко поясом златым препоясанный. Радуйся, за незлобие твое Господом блаженством увенчанный; Радуйся, заступником града Симбирска преподобным Серафимом нареченный; РАДУЙСЯ, БЛАЖЕННЕ ОТЧЕ АНДРЕЕ, ГРАДА СИМБИРСКА ЧУДНАЯ ПОХВАЛО И ЗАСТУПЛЕНИЕ. КОНДАК 8. Грех ради и беззаконий человеческих попущением Божиим буря безумнаго безбожия разруши державу Российскую, Церковь же Божию постиже огненное искушение. Руце нечестивых оскверниша место упокоения твоего, блаженне Андрее, но божественным промышлением в последняя времена явлено нам место погребения и честныя мощи твоя. Вернии же, чудящеся сему, радостно поют Богу: АЛЛИЛУИА. ИКОС 8. Имея неисчерпаемое богатство чистоты душевныя и смиренномудрия, веру несумненную и помысл чист, юродствуя во Христе, неленостно служил еси Господеви всем житием своим. Темже, яко звезда путеводная светиши всем в житии ко Христу идущим. Сего ради высокого подвига твоего вопием ти сицевая: Радуйся, живый храм Божественнаго терпения; Радуйся, гордых сердцем обличавый смирением ; Радуйся, красото смиренномудрия и воздержания; Радуйся, образе кротости и послушания; Радуйся, ангелоподобный человече; Радуйся, безмолвниче дивный; Радуйся, тайно в молитве от бед сохраняющий; РАДУЙСЯ, БЛАЖЕННЕ ОТЧЕ АНДРЕЕ, ГРАДА СИМБИРСКА ЧУДНАЯ ПОХВАЛО И ЗАСТУПЛЕНИЕ. КОНДАК 9. Все житие твое поработих заповедем Христовым, яко раб благий, его же дивно Сам Царь Славы прослави. Всякия скорби и тесноты претерпел еси: заушения, оплевания, поношения и осмеяния, радостно шествуя узким путем жития твоего, блаженне Андрее. Сего ради и Христос тя со блаженными вселил еси, с ними же в вечном Его Царствии поеши ангельскую песнь: АЛЛИЛУИА. ИКОС 9. Витийствующий язык и гордый ум совопросников века сего не возможет по достоянию уразумети земное житие твое, блаженне Андрее, яже совершил еси, шествуя ко Христу. Кто бо доволен изрещи высоту подвига юродства твоего и кто изочтет самоотвержение и высоту духа твоего, небесный человече и земный ангеле. Мы же, смирением твоим побеждаеми, зовем ти таковая: Радуйся, прибежище наше в земных скорбех; Радуйся, скорый помощниче в тяжких обстояниях; Радуйся, источниче обильный благодатию; Радуйся, заре пресветлая смирения, души грешных озаряющая; Радуйся, теплото любве божественныя нас согревающая; Радуйся, звездо, лучами своими души гордых человек уроком смирения просвещающая; Радуйся, силою Божией, данной тебе, бесноватых исцеляющий; РАДУЙСЯ, БЛАЖЕННЕ ОТЧЕ АНДРЕЕ, ГРАДА СИМБИРСКА ЧУДНАЯ ПОХВАЛО И ЗАСТУПЛЕНИЕ. КОНДАК 10. Господь хранит вся кости праведных, и ни едина от них сокрушиться. Ныне дивно явишася нам мощи твоя, блаженне Андрее, яко животворный источник благодати, омывающий скверную нечистоту душ наших. Благодать бо изливаеши всем, с молитвою к тебе притекающим и поющим Богу: АЛЛИЛУИА. ИКОС 10. Стеною необоримою явился еси граду Симбирску и стране нашей, крепкий заступник в бедах и скорбех многомятежнаго сего жития живущим. Тебе убо молим, блаженне Андрее, укроти гордость ума нашего и научи воспевати тебе сице со смирением: Радуйся, прелести мира ни во что же вменивый; Радуйся, Христу Богу всем житием послуживый; Радуйся, блаженство вечное унаследовавый; Радуйся, всякую гордость в себе уничиживый; Радуйся, греховных ран скорое врачевание; Радуйся, ставших на путь покаяния доброе поддержание; Радуйся, страны нашея чудное радование; РАДУЙСЯ, БЛАЖЕННЫЙ ОТЧЕ АНДРЕЕ, ГРАДА СИМБИРСКА ЧУДНАЯ ПОХВАЛО И ЗАСТУПЛЕНИЕ. КОНДАК 11. Пение наше молебное приими, блаженне отче Андрее, се бо верою и любовию к тебе прибегаем, преклоняем пред смирением твоим колена жестоковыйных сердец наших, и прославляем прославльшаго тя Господа, молимся ти: умири волнующееся море жития нашего, укроти смущение человеческия, да зовем дивному во святых своих Богу нашему: АЛЛИЛУИА. ИКОС 11. Новоявленную звезду, путеводящую нас по пути ко спасению, ныне возсиявшую на тверди церковней, видим тя, блаженне Андрее, и светом подвига твоего озаряеми, твердо веруем и уповаем на предстательство твое пред Господем за нас недостойных и зовем ти таковая: Радуйся, сосуде Духа Святаго исполненный; Радуйся, дарами его просвещенный; Радуйся, кротости и смирения Христова вместилище; Радуйся, младенческия чистоты и искренняго незлобия хранилище; Радуйся, яко и по преставлении твоем в небесныя нас не оставляющий; Радуйся, яко милосердие Божие о гресех наших умоляеши; Радуйся, всем притекающим к тебе пред Богом предстателю; РАДУЙСЯ, БЛАЖЕННЕ ОТЧЕ АНДРЕЕ, ГРАДА СИМБИРСКА ЧУДНАЯ ПОХВАЛО И ЗАСТУПЛЕНИЕ. Благодать приял еси от Господа, блаженне Андрее, провидети духовныма очима всяк тайный грех и сокровенный недуг душевный в людех: подаждь убо и нам, грехми ослепленным, зрение темноты и недостоинства своего, да исцеление молитвами твоими, чистым сердцем и усты, радостно поем ангельскую песнь Богу: АЛЛИЛУИА. ИКОС 12. Воспеваем твоя великия подвиги, блаженне Андрее, почитаем самоотвержение и юродство твое во Христе, ублажаем твою святую кончину, славим в немощнем теле мужество неизреченное и, в похвалу подвига земнаго жития твоего, вопием ти сицевая: Радуйся, жестоким путем юродства райских селений достигший; Радуйся, нищетою богатство вечное обретший; Радуйся, уничижением познавый мир высочайший; Радуйся, поношением от безумных, Христа ради, вечную славу с Ним стяжавший. Радуйся, чистым сердцем любовь Христову познавший; Радуйся, омраченных духом прелести и гордыни смирявший; Радуйся, лед злобы нераскаянных сердец любовию твоею растопивший; РАДУЙСЯ, БЛАЖЕННЕ ОТЧЕ АНДРЕЕ, ГРАДА СИМБИРСКА ЧУДНАЯ ПОХВАЛО И ЗАСТУПЛЕНИЕ. КОНДАК 13. О, преславный угодниче Христов, добрый тайновидче душ человеческих, святый блаженный отче Андрее, крепкое наше заступление пред милосердием Божиим! Приими от нас, грешных и недостойных, сие малое моление наше от любве тебе приносимое, и твоим предстательством умири наши бури житейския, укроти гордыню ума человеческаго, исправи наш стропотный путь греха и даруй нам дар покаяния совершеннаго, очисти от всякия нечистоты, да в купе с тобою вопием Спасителю нашему и Господу ангельскую песнь: АЛЛИЛУИА, АЛЛИЛУИА, АЛЛИЛУИА. М О Л И Т В А КО СВЯТОМУ БЛАЖЕННОМУ АНДРЕЮ, ХРИСТА РАДИ ЮРОДИВОМУ, СИМБИРСКОМУ ЧУДОТВОРЦУ. О, смиреннейший и дивный угодниче Христов, еблаженне отче Андрее ! ы измлада мир сей видимый и привременный ни во что вменил еси, и иго неизреченныя любви Христовой на себя подъял, с ним же безропотно шествовал всем житием твоим, заповеди Спасителевы исполняя со тщанием и смирением. Темже тя Господь Славы прославил и сподобил зрети Свет Истины. ы же грешнии, потемненными и гордыми очами умов наших зрящие лишь земная и суетная века сего развращенного и погибельнаго, преклоняя колена озлобленных сердец наших пред высотою подвига твоего, смиренно молим тя, блаженне Андрее: молитвами твоими свободи нас от порочных земных помыслов и страстей, укроти злобствования и гордыню в душах наших, недугующих душею и плотию исцели, скорбящим помози, грешных на путь спасения настави, буди заступником усердным во всем житии нашем, тя бо великого ходатая и молитвенника за нас, недостойных, Господь нам послал. й, дивный угодниче Божий, исходатайствуй молитвами твоими вся, яже ко спасению нам способствующая, град сей и страну нашу от всякаго искушения и озлобления помощию твоею сохрани, да предстательством твоим соблюдаеми, славим велие долготерпение Божие к нам недостойным всегда, ныне, и присно, и во веки веков. АМИНЬ. Храм во имя Всех Святых г. Ульяновска Адрес храма во имя Всех Святых: 432063 г. Ульяновск ул. Ульяновская,2 для писем - ктитору храма протодиакону о. Алексию Скала тел. храма - (8442) 32-95-50 Доехать до Всесвятского храма можно: - от железнодорожного вокзала трамвай №10 до остановки “Ул.12-го Сентября” трамвай №4 до остановки “Ул. Железной Дивизии” - от автовокзала трамвай №13 трамвай №2 до остановки “Ул.12-го Сентября” Храм расположен рядом с перекрестком улиц Минаева и 12-го Сентября недалеко от моста через р. Свияга Вернуться в начало сайта > Содержание книги: Simbirsk Banner System

Сайт управляется системой uCoz